Rwanda : Ibiciro by’ingendo Rwandair Rubavu – Kigali zaruriye


Ibiciro byingendo Rwandair

Kuva tariki 13 Gashyantare ibiciro by’ingendo mu ndege ya Rwandair ziva Rubavu zijya mu mujyi wa Kigali zavuye ku madolari 119 zigera kuri 136 ku muntu mukuru.

Ku bana na bo bafite munsi y’imyaka 12 y’amavuko, igiciro cyavuye ku madolari 76 kijya ku 116.

Twashatse kubaza Ornella Kayitesi, umuyobozi wa Rwandair ishami rya Rubavu impamvu yo kuzamura ibiciro ariko ntitwabasha kumuvugisha kuri telefoni. Gusa umukozi ushinzwe ubucuruzi bw’amatike Musoni Hodari Innocent yadusobanuriye ko iki cyemezo cyafashwe n’ubuyobozi bukuru bwa Rwandair.

N’ubwo abanyarubavu batitabira ingendo zo mu kirere cyane, Musoni avuga ko ntacyo ibiciro byahinduye ku bwitabire bw’abakiriya babo. “Indege kenshi ziba zuzuye, yego impinduka zose ziravuna ariko abakiriya bacu barabyumva.”

Musoni akomeza avuga ko benshi mu bakiriya babo ari abakomoka muri Repubulika Iharanira Demokarasi ya Kongo. Ngo na bo bahamya ko igiciro cya Rwandair kiri hasi ugereranyije n’andi makompanyi y’iwabo i Goma aho usanga bagomba kujya i Kinshasa mbere yo kugira ahandi bajya kandi ugasanga indege zabo zifite ibibazo. Ati “kenshi cyane indege ziragwa kubera ko zitubahiriza amabwiriza.”

Musoni avuga ko Rwandair ifite serivisi nziza irusha abandi haba mukubahiriza amasaha, kudahindura ingendo n’iyo indege yaba irimo abakiriya babiri, irahendutse, kwishyura amatike byorohereza abakiriya no kudaca amafaranga y’inyongera igihe uhinduye n’ubwo ibi biri hafi kuvaho. Ati “urumva ko igiciro kiri hasi ugereranyije na serivisi dutanga.”

Nyamara abanyarwanda bo babona ibiciro biri hejuru ugereranyije n’uko ubukungu bwabo buhagaze. Jeanne Uwamahoro ati “Sinakwirarira ngo ndagenda mu ndege kuko amikoro ntabinyemerera, abakongomani ni bo basubijwe!”

Ubwo iyi kompanyi yafunguraga ingendo zayo i Rubavu tariki ya 23 Kanama 2011, igiciro cyari gihagaze amadolari 100. Rwandair ifite ubushobozi bwo gutwara abagenzi 18 kugera i Kigali ni iminota 30 gusa. Ingendo zayo ni buri munsi saa tatu n’igice uretse kuwa kane.


Leave a Reply

Copyright © 2012 , All Rights Reserved

Designed by Web Directory. Thanks to Free Wordpress Themes